L’Archivi di Stât di Udin cun chestis notis al intint judâ ducj chei che a vuelin vê i documents anagrafics dai lôr vons nassûts tal teritori di chê che vuê e je la regjon Friûl Vignesie Julie rispuindint aes domandis plui.

Cui daial fûr la copie autentiche dai documents dal militâr?

La consultazion dai documents e je libare li dal Archivi di Stât che al pues dâ fûr la copie autentiche dal esit di jeve (liste di jeve o liste di estrazion) e dal rûl matricolâr dal Distret Militâr sul servizi fat dal coscrit.

Cui daial fûr i documents anagrafics?

I documents anagrafics dai vons ju dan fûr dome i Uficis di stât civîl. Intai Archivis di Stât si pues fâ la libare consultazion, par resons di studis storics, dai regjistris di stât civîl (ats di nassite, matrimoni e muart) dal 1871 che a son la copie dai documents conservâts tai Comuns.

I uficis di stât civîl tra il 1800 e il 1900 jerino i stes di vuê?

I Uficis di stât civîl a jerin li dai comuns o li des glesiis. Chest parcè che il Friûl Vignesie Julie nol jentre a fâ part dal Ream di Italie dut tal stes timp e partant daspò dal 1866 ancjemò tancj teritoris a restin sot des leçs dal guvier austriac. Cussì, tant che in Italie dal 1871 il servizi di stât civîl al passave ai comuns, in Austrie lis funzions di uficiâl di stât civîl lis fasevin ancjemò i predis.

E alore a cui si aial di domandâ?

Par cjatâ l’archivi dal comun o de glesie che al ten cont lis cjartis anagrafichis dal von nassût tal Votcent o tai prins agns dal Nûfcent bisugne partant cognossi la storie dal Friûl Vignesie Julie dai ultins timps e lis fasis de formazion di chês che vuê a son lis provinciis di Udin, Gurize, Pordenon e Triest.

Cualis informazions si cjatino intai archivis dai Uficis di stât civîl?

I archivis di stât civîl in vore dal 1871 a cjapin dentri i regjistris di nassite, di matrimoni e di muart dai citadins talians. Su di chei stes regjistris di nassite si notin ancje lis gnocis, precisant la localitât li che a son stadis celebradis, la date e il non dal om o de femine e, par finî, la date e il lûc de muart. Chescj inzornaments sui regjistris si fasin ancje par chei che a van vie intun altri comun o intun altri stât, ma dome se e rive al ufici comunâl dute la documentazion in merit. Partant a puedin passâ ancje diviers agns di un fat ae sô regjistrazion.

Cualis informazions si cjatino intai archivis dai Uficis di stât civîl des glesiis?

Ancje i regjistris des glesiis a cjapin note des nassitis, des gnocis e de muart daûr de leç austriache. Par sigurece in chê volte si jere fate ancje une copie di ogni regjistri e le si veve dade ae Curie Vescovîlche lis conserve intal so archivi storic ancjemò vuê. In cualchi localitât lis anagrafis des glesiis a regjistrin ancje i nons dai parincj.

Cuâi dâts coventino par domandâ lis copiis dai certificâts anagrafics?

I elements che a coventin par jemplâ une domande di mandâ ai uficis di stât civîl a son chescj: non e cognon dai vons citadins talians, pari e mari, an e comun di nassite. Par ognidune des provinciis (Udin, Pordenon, Gurize e Triest), si pues cjatâ la liste sul sît istituzionâl:

Se no si àn dâts sigûrs cemût si puedie vierzi une ricercje?

Cuant che no si àn chescj dâts al devente cuasi impussibil vierzi une ricercje e otignî i documents. Partant l’interessât al varà di fâ une ricercje su lis origjinis de sô famee e dai siei vons cirint di tirâ fûr lis informazions gjenerâls e particolârs che a puedin puartâlu viers une identificazion plui precise.

La utilitât di Friuli in prin

Par judâ la ricercje l’Archivi di Stât di Udin al à metude dongje la bancje di dâts Friuli in prin, che e cjape dentri lis informazions anagrafichis ripuartadis sui ats di matrimoni che si riferissin al cors di timp 1871-1900 par ducj i comuns de provincie di Udin (infûr de zone che e jere sot de Austrie) e chês ripuartadis sui esits di jeve pes classis 1846-1890 dai mandaments di Dimpeç, Cividât, Glemone, Tisana, Mueç, San Denêl, San Pieri, Tumieç e Tarcint. A mieç de bancje di dâts e presentant la domande par otignî la copie dal at, si pues partant cognossi i dâts anagrafics e il comun di origjin dal propri von. Stant che si è simpri daûr a incressi l’inseriment dai dâts di Friuli in prin, al pues sucedi che i dâts di cierts citadins no sedin ancjemò stâts metûts dentri. In chest câs, se l’interessât al fâs domande, l’Archivi di Stât al podarà fâ la ricercje diretementri su lis fonts.

ARCHIVI DI STÂT
Via F. Urbanis 1
33100 U D I N E

Dongje di ricercjis dome di caratar gjenealogjic, la bancje di dâts e pues ancje judâ i talians tal forest dissendents di emigrâts che a vuelin otignî la citadinance taliane. A chest pro, o visìn che la regjon Friûl Vignesie Julie e met a disposizion dai utents informazions sui servizis, su lis ativitâts e lis iniziativis pai coregjonâi sul sît istituzionâl: www.emigrazione.regione.fvg.it